قبل ما تتعاطفوا افهمو القصة بشكل تقني اكتر علشان تعرف هي واخدة ١٠ سنين علي ايه ، هنتكلم كلام مبرمجين شوية معلش علشان نفهم القصة
- في نوعين من التطبيقات ( تطبيقات تجارية - تطبيقات سيئة السمعة )
1- المبرمجين بيعملوا حاجه جميله كده في التطبيقات بتاعتهم اسمها ريفيرال بإختصار لو أنت فاتح اكاونت في أي تطبيق تجاري بتكسب منه أو بتشتري منه زي مثلاً سوق أو أمازون ممكن تاخد لينك الريفيرال تبعته لصحابك أو تسوقوا للناس علشان يسجلو عن طريقك فا تكسب مثلاً من كل عمليه بيع ٥٪ او ١٠٪ او ٢٠٪ لحد هنا دية حاجه إسمها التسويق بالعموله.
- الريفيرال ده بيبقي عباره عن كود أما الشخص ال هيسجل يحط الكود يدوي أو يدخل علي اللينك علي طول فأنت تاخد نسبتك تلقائي.
2- التطبيقات سيئة السمعة ( الدعارة ) دية في منها نوعين انتشروا نوع بتفتح التطبيق تطلب واحدة تجيلك البيت والتاني اونلاين بتقولك أنت هتدفع ١٠ دولار في صورة كوينات بتكون شاريها من التطبيق وبالمقابل هتقعد معاك ١٠ دقايق طيب النظام بيبقي ايه ؟؟ بص يا باشا في رجاله مهاويس بانهم يتفرجو علي بنات قاعده مبتعملش حاجه وتدلهم كوينات ( اها والله زي ما بقولك كده ) الرجاله ديه بقه لما بتوصل لذروة النشوة بيعملوا حاجه اسمها برايفت ريكويست بمقابل عدد من الكوينات فا البنات اللي بتدخل علشان تفتح الايف بس وتكسب ٥ الاف جنيه بتجيلها عروض كتير للبرايفت فا طبعاً لو البنت داخله تفتح لايف مش اكتر وتكسب من غير ما تعمل حاجه فا بعد شويه لما يجيلها الافات الدولارات هتبدا تدخل البرايفت لأن أصلا التطبيقات ديه معموله علشان كده ... كانها عامله مثلا جزء للبنات ال فاكره أنها كده محترمه وبتفتح لايف وهي قاعده وخلاص علشان بعد كده تخليهم مش محترمين ويدخلو البرايفت .. يبقي رجليهم اتجرت للموضوع بشياكه لأن لو اتعرض عليهم علي طول يدخلو برايفت مش هيوافقوا لكن إحنا كلنا عارفين ساعة الكاش كله بيبقي ببلاش للأسف.
- ايه بقه علاقه الريفيرال بالتطبيقات وازاي كسبت حنين حسام من الموضوع؟
- باختصار هي عمله اكونت وجربت وعرفت الموضوع ماشي إزاي فا قالتلك ماشي أنا عندي جمهور كبير هروح اقولهم يسجلوا عن طريقي وهما يدخلوا يفتحوا الكاميرا عادي فا يجيلهم كوينات فا أكسب أنا من نسبة الكوينات ديه علي طول ماهو المكسب مش هيخلص وفي نفس الوقت أنا مقولتلهمش يدخلو رومات البرايفت خالص ده أنا قايلالهم بالحجات ... يبقي لو دخلو مثلا ٢٠٠٠ بنت وكل بنت باخد ٢٠٪ من أرباحها وهنعتبر كل واحده كسبت ١٠٠ دولار بس يبقي أنا كسبانه وأنا نايمه في بيتي ٤٠ الف دولار من غير ماعمل اي حاجه وهنا بقه القضية علشان بس الناس اللي بتقارنها بالممثلين والناس اللي بترقص والكلام ده ... باختصار هي بتاخد عموله علي بنات بتشتغل في الدعارة يبقي هنا هي ايه؟؟؟ ( قوادة ) وبتضحك علي البنات اللي سنها صغير علشان يفتحو لايف بس لكن الحقيقة هما كده بيشتغلوا في الدعارة يبقي هنا قضية ايه؟؟؟ ( اتجار بالبشر)
لا تتعاطف مع حنين
- لو أنت متعاطف معاها فا خلي بالك أن كان ممكن بنتك أو أختك او أي حد بريء يقع في المصيدة ديه وطبعا أنت مش هتكون فاهم نهائي اللي بيحصل دة موضوع جديد وغريب وكنت هتلاقي بنتك قاعده عادي بلبسها وكل حاجه بس فاتحة الموبايل وطبعا عمرك ما هييجي في بالك ان بنتك بتشتغل في الدعاره تخيل؟؟؟؟؟؟؟؟
فكره بقه حنين حسام كانت عارفه كل ده ولا كانت مخدوعة ومش فاهمه لأ يا باشا هي فاهمه كويس لأن أي واحد بيفتح التطبيقات ديه لمده دقيقتين هيعرف لأن ببساطه التطبيق مش عايزك تخرج إلا لما تدفع فا بيوضحلك اتجاهاته إيه بالظبط علشان يغريك !!!!
فيديو حنين حسام وهي بتعيط للأسف بيدل إنها شيطان في صورة إنسان لأنها لحد دلوقتي بتحاول تستعطف الناس ؟؟
ماهو للأسف في وسط كل ده الناس فاكره أنها اتحبست علشان كانت بترقص .... قبل ما تتعاطفوا مع حد اعرفوا كويس جدآ إن مش دائماً الحكومه بتشرح الأسباب لأي قضية الحاجة اللي تدايق في الموضوع ان ألاقي أمهات وبنات في الكومنتات بتقول كتير ١٠ سنين أنتم سايبين ليلي علوي ويسرا ليه إيه الفرق !!! للأسف أنتي كنتى ممكن تبقي ضحية من غير ما تعرفي أو أختك او بنتك فا أرجووكم حاولوا تقراو كويس وتعرفوا لأن عالم الاونلاين فيه بلاوي أقسم بالله تهدم بيوت وتقضي علي امم كاملة فا بلاش السذاجة تعميكم لحد ما تقعوا المصيدة وتندموا وتقولوا مكناش عارفين.
تعليقات
إرسال تعليق