مسلسل " الإختيار 2 - رجال الظل "... بين النجاح الساحق و السقطة الكبيرة و الهجوم المتعمد

        الحقيقة مكنش فيه حد متخيل, ومنهم انا, انا مسلسل "خلي بالك من زيزي" هيصبح واحد من اقوي مسلسلات دراما رمضان 2021, ان لم يكن افضلهم علي كل المستويات. المسلسل بالنسبالي كمشاهد و متابع جيد للدراما المصرية و الأجنبية هو حالة استثنائية من الجودة والاحتراف في كل تفصيلة من تفاصيل المسلسل, وكل خطوة في صناعة العمل ده.

القصة ...

         مبدأيا كدا القصة أو فكرة العمل لازم تكون مقبولة و متوازنة , و هي اهم عامل في نجاح اي عمل درامى وتعلق الجماهير به, القصة من فكرة مني الشيمي وسيناريو وحوار ورشة ترأسها الكاتبة الكبيرة مريم نعوم, التي صاغت احداث المسلسل بحروف من ذهب, وأسست للأحداث بشكل اكتر من رائع, والحقيقة الشخصيات في المسلسل جميعهم بلا استثناء شخصيات مكتوبة بشكل كبير جدا من الاحترافية والواقعية, كل الشخصيات متقنة وبتتطور تطور طبيعي وحقيقي جدا علي مدار الاحداث, وكل الشخصيات ليها خلفية وتاريخ وقصة معقدة بكل تفاصيلها, وده الي مخليهم شخصيات ثلاثية الابعاد, وكأننا بنتفرج علي ناس نعرفهم من زمان مش شخصيات خيالية.الحقيقة الcharacter development في المسلسل مشفتش زيها قبل كده. 

          اتبسطت جدا بالاهتمام البالغ بكل شخصيات المسلسل حتي الشخصيات الثانوية, واعطاء كل شخصية حقها بقصة وخلفية متقنة ومفصلة خليتنا نفهم دوافع ونفسيات كل شخصية من الشخصيات , مش شخصيات كرتونية زي كتير من الاعمال الدرامية في الفترة الاخيرة, و كمان التسكين الجيد للابطال فى شخصيات المسلسل و اللى شارك عدد منهم مع بعض فى مسلسل قابيل فى رمضان 2019

ابطال العمل ..

        ابطال المسلسل من افضل ما يكون, كل الممثلين بلا استثناء بيشتغلوا مع بعض في حالة تناغم استثنائية, مخلية المسلسل وكأنه سيمفونية ساحرة من الابداع والسلاسة والجمال, يترأسها المايسترو المخرج الشاب العبقري "كريم الشناوي" الي اثبت نفسه بجدارة في السنين الاخيرة, والي اخرج لنا صورة وكادرات من اجمل ما يكون.

       لو هتكلم عن امينة خليل فهي بتقدم اقوي دور ليها في مسيرتها الفنية, شخصية "زيزي" شخصية مش سهلة ابدا, بل هي شخصية معقدة وليها ابعاد كتيرة ومختلفة واحيانا متناقضة. لكن امينة خليل قدرت تجسد كل الصفات المتناقضة في شخصية زيزي بشكل اكتر من رائع بكل تفاصيلها وفرحها وزعلها وعصبيتها وطيبة قلبلها بجل بسلاسة مش طبيعية من غير اي افورة ولا تبريق ولا استخفاف بعقل الجمهور. فظهرت شخصية زيزي وكأنها شخصية حقيقية تماما كلنا عارفينها او علي الاقل نعرف شخصيات شبهها, وخليتنا نتعاطف معاها ونزعل علي زعلها ونفرح لفرحتها رغم اننا مدركين انها شخصية غير كاملة وفيها عيوب كتير كأي بني آدم طبيعي.

        احب اوجه تحية لأمينة خليل برده علي انها استحقت تكون بطلة مسلسل عن جدارة, واثبتت لكل اشباه وشبيهات الممثلين والممثلات ان البطولة مش بالواسطة أو بالتترات ولا بكثرة المشاهد ولا بأنك تجيب ممثلين يخدموا عليك, بل البطولة ان كل فرد من افراد العمل يكون ليه مساحته الكاملة في انه يبدع ويطلع افضل ما عنده, وده خلي ان في كثير من الحلقات مشاهد امينة خليل هي الاقل في الحلقة عشان تدي مساحة لباقي الشخصيات والممثلين انهم يظهروا ويطلعوا كل طاقتهم التمثيلية. ده لأننا امام ممثلة شديدة الموهبة واثقة في موهبتها ومدركة كويس جدا ان نجاح اي مسلسل هو عمل جماعي وليس فردي.

     محمد ممدوح بيقدم دور رائع ومختلف تماما عن اي حاجة قدمها من قبل, شخصية مراد الفرماوي شخصية المحامي الرايق صاحب المزاج والي حياته بتتشابك مع حياة "زيزي" بشكل غير متوقع, وده بالنسبالي احد افضل ادوار محمد ممدوح ومختلف كل الاختلاف عن دوره في مسلسل "لعبة نيوتن" وده بيثبتلنا قد ايه محمد ممدوح ممثل من اقوي و من امهر الممثلين الموجودين حاليا في مصر.

     نيجي نتكلم عن باقي ابطال المسلسل, نهي عابدين بتقدم دور اكتر من رائع ومن احلي الادوار في المسلسل وبيثبت قد ايه هي ممثلة متنوعة وموهوبة جدا, اما اسماء جلال قدمت احلي دور في مسيرتها الفنية وقدرت بكل بساطة من غير افورة تقنعني بشخصية الام القلقانة علي بنتها ومستقبلها وبتحاول تساعدها بكل الطرق , اما علي الطيب اضافة جميلة جدا للمسلسل ... حبيت شخصيته ومشاهده والكيميا الي بينه وبين اسماء جلال واداءه كان سلسل وبسيط ومقنع تماما. 

        الفنانة القديرة صفاء الطوخي كالعادة متألقة وحبيت دورها جدا خصوصا في مشهد المواجهة مع بنتها, وكذلك الفنانة الكبيرة سلوي محمد علي الي ادت دورها كما ينبغي برده.

    الفنان المتميز بيومي فؤاد حسيت انه لم يتم الاستفادة بقدراته وطاقته التمثيلية كما ينبغي, وحسيت ان مشاهدة قليلة في المسلسل ومقدمش جديد باستثناء مشهد قوي جدا قدمه امام امينة خليل وكان من احلي مشاهد المسلسل.

         نيجي للفنان الشاب "علي قاسم", الي زي ما يكون مخلوق لدور "هشام عسل", لبس الشخصية بشكل مرعب بكل تفاصيلها وعقدها النفسية وهدوءها وخجلها وهو بالنسبالي كان مثال علي السهل الممتنع الي قدر يخرجلنا واحدة من احلي الشخصيات في دراما رمضان 2021.

       اما الممثلة الشابة "جلا هشام" مصدقتش انها اول مرة تمثل, لأنها عملت شخصية ياسمين بقدر كبير جدا من الاحتراف, وعجبني جدا التغيرات الي حصلت لشخصيتها من اول المسلسل لآخره واظهارها لطبقات كتيرة مختلفة بشكل اكتر من رائع. برده لازم نذكر دور الشاب "سراج" الي كان من احلي الادوار بالنسبالي في المسلسل وعجبتني جدا مشاهده مع علي قاسم والصداقة الي بينهم.

       مفاجأة المسلسل بالنسبالي هي الفنان القدير "صبري فواز", الي قدم الي يمكن يكون اقوي دور في حياته بالنسبالي. صبري فواز قدم افضل تشخيص لشخصية الطبيب النفسي في الدراما المصرية من فترة كبيرة, شخصية حقيقية تماما, معقدة ومختلفة وليها سماتها الخاصة, ومن كتر جودة ادائه للشخصية في ناس كتير قررت تذهب لطبيب نفسي بعد مشاهدة المسلسل وده بيعكس الحالة الرائعة الي عملها الفنان صبري فواز في تجسيده لشخصية "دكتور سامي" الي رغم من كونها ضيف شرف الا انها اهم شخصية في المسلسل وشخصية محورية لتحول احداث كتير جدا وله تاثير مهم علي باقي الشخصيات كلها.  

       حتي ظهور ضيوف الشرف كان معمول حسابه, اتبسطت جدا بشخصية محمد فراج المتميز والي كان اضافة لذيذة جدا للمسلسل, والكابتن "كرم جابر" كان دوره حلو جدا في المسلسل برده, وكمان دور الفنان مفيد عشور كان موفق. والخط الدرامي بين الفنان محمد ممدوح والفنانة "نادين" كان برده لذيذ بالنسبالي محستش انه مقحم علي القصة او اي حاجة.

المسلسل ...

     اتبسطت جدا بالحالة الي ظهرت في المسلسل, الي بدأ بلايت كوميدي دراما خفيف, ومع الاحداث خصوصا الحلقات الاخيرة تحول المسلسل لمسلسل درامي تقيل جدا ومعقد و متشابك , وعجبني الكشف تدريجيا عن المشاكل والعقد النفسية لكل الشخصيات, والتركيز علي اهمية العلاج النفسي في التغيير الجذري الي حصل لكل شخصيات المسلسل. 

     وطبعا اهم حاجة في المسلسل التوعية الي اتعملت علي مرض ADHD والي يمكن ده اول مسلسل يتكلم عنه, وخلق حالة من الحوار المجتمعي عن الامراض النفسية بشكل عام وبدأ الناس يتكلموا عن اهمية العلاج النفسي وان معظم الامراض والمشاكل النفسية بتبدأ مع الطفولة وبتكمل بعد كده.

         في النهاية احب اوجه الشكر الجزيل لكل افراد العمل بداية من الكاتبة الكبيرة مريم نعوم والمخرج الموهوب كريم الشناوي, وأمينة خليل وباقي فريق العمل كله والموسيقي التصويرية كمان. لكن اهم حاجة اتبسطت بيها ان المسلسل ده اثبت فعلا جمال رسالة الفن كما ينبغي ان تكون, وعن طريق المسلسل ده, حصلت حملة توعية كبيرة جدا في مصر خلت ناس كتيرة تبدأ تدور علي علاج نفسي, وناس كتيرة منهم انا جالهم inspiration من المسلسل انهم يعملوا تغييرات ايجابية في حياتهم زي لعب الرياضة.

تقييم مسلسل خلي بالك من زيزى 

العمل كان متكامل إلى حد كبير ليستحق تقييم 8\10، نظراً لإنه حالة مميزة مبتتكررش في الدراما كتير, عمل فني من اول الأغنية الجميلة جدا جدا جدا حتى تتر النهاية .. تقدر تقول عليه عمل متكامل, لوحة فنية متقنة علي جميع الاصعدة, كل فرد من افراد المسلسل قام بدوره كما يجب ان يكون, واتمني باقي صناع الدراما في مصر يتعلموا ويعرفوا معني البطولة الحقيقية وازاي تعمل عمل فني يأثر ايجابيا في حياة الناس ويعيش كتير لسنين قدام....